Jonggrang dan Geguritan Lainnya

Jonggrang

 “Roncenen geguritan sewu gatra

Bab nggrantese katresnanmu marang aku

Kaya pamujane Qais menyang Layla

dak kanthi, sewengi kudu dadi”

Kandhamu nalika iku,

kaya Jonggrang sing njaluk bebana sewu candi

Sing gedhe pangapuramu ya, wong ayu

Tresnaku pancen mung kowe, tan ana liyane

Aku bisa wae nganggo metaAI utawa gemini

Ora suwe, tengah wengi iki uga bakal dadi

Nanging mangertiya, bilih katresnanku

Mokal bisa winengku tembung lan ukara

Senadyan saleksa gatra cacahe

                        Ketawang, 15/10/2026

Bapak

Nalika isih cilik kawuri

Aku ngira yen Bapak janma setengah dewa

Otot kawat balung wesi pangawak braja

Bisa mrantasi samubarang gawe

Mbendung kali mindah ardi

Uga nyangga langit lan methik kartika

Kanggo putra-putrine

Nganti teka wancine bayar ragad sekolah

  lan maneka tagihan beya omah-omah

Aku nyawang Bapak lungguh ijen

Nganti lingsir wengi ing teras ngajeng griya

Astanira nyangga wang, dene paningal suwung

  nyawang awang-awang

Sidhem tanpa swara, nanging netrane blaka

Ngumbar crita bab awrating panguripan

Ora ngira yen saiki

Bapak sing lungguh ijen nyangga wang

  ing madyaning ratri kuwi

Aku

            Malang Brang Kidul, 31/10/2026

Donga Lingsir Wengi

Gusti, menawi wonten setunggal kemawon donga

  ingkang Panjenengan kersa ngijabahi,

Kula nyuwun ganti  pangarsa negari

Amrih hayuning bebrayan ing bumi pertiwi

Mara saklerapan ana wewisik sajrone wardaya

“Ulun ora bisa nyembadani donga pangajabira

Mangertiya yen ana 58 persen titah,

Ya bala-wargamu dhewe sing uga ndedonga

Kosok baline saka panyuwunanmu.”

Gusti, menika leres dhawuh pangandikanMu,

Napa namung swarane jim setan peri prayangan

Sing tansah ngrubeda janma manungsa?

                        Bululawang, 28/10/2026, 01.10

Sajadah

Sawise sembahyang ngisak mengko

Ora ketang sedela, gawanen aku miber ngambah mega

Mbok menawa nganti mletheke bagaskara

Mugya bisa dadi panglipuring ati

Saka kahanan kang sarwa nguciwani

Gawanen aku ngawang menyang angkasa

Mblesat menyang negari antah-brantah

Kaya dongenge bapa-biyung nalika semana

Ing wengi-wengi kang kebak pangresah

Sabubare tahajud tengah wengi iki

Oncatke aku menyang praja neverland

Mesisan dadi wadyabalane  Peterpan si lare

Tinimbang ngawula ing tlatah kene

Dipimpin tiyang sepuh nanging polahe

  kaya bocah wingi sore

Oncatke aku methuki Aslan ing negari Narnia

Karuan ngawula marang sato kang ngugemi bebener

Tinimbang ing kene, tansah rekasa direksa pamarentah

Kang sakobah-mosike sarwa keblinger

Ajaken aku menyang endi wae

Waton ora ketemu MBG lan KDMP

Ketawang, 15/07/2026

Mangga Joged, Ndara

Mangga joged, Ndara..

Mumpung gendhinge wus talu

Waranggana uga sampun sumadya

Njenengan ngersakne gendhing menapa,

Srepeg napa sendhon?

Sampak napa pathetan?

Mangga jogedan, Ndara..

Nglerem pikir ngaso sawetara

Njenengan yekti sayah butuh tetirah

Perkawis negara ben digagas pra kawula

Supaya ajar ngupadi butuhe dhewe-dhewe

Ora kabeh-kabeh kudu diatur panguwasa

Mangga beksan, Ndara..

Beksan wireng napa bandabaya

Tayungan Werkudara ugi mboten menapa

Pamer olah yudha kaprawiran mring sedaya

Amrih para panyacad padha nyisih

Lan mengsah samya jirih

Saged kalajengaken beksan bancak doyok

Jumbuh klawan kahanan kang sarwa peyok

Kamangka njenengan sampun mboten kirang-kirang

Anggone ngobral program lan undang-undang

Prandene rakyat kok isih ‘dha sambat

Mula dijogedi wae, Ndara..

Kuping lan netra disumpel sawetara

Nanging aja nyalahke sapa-sapa, Ndara..

Yen para niyaga kae ujug-ujug mbalela

Nabuh gendhing jengkaran

Nalika titi wancine isih jejeran

            Ketawang, 05-05-2026